पुण्यातील पर्वतीवर रोप-वेने जात येणार ! सल्लागार नियुक्तीच्या प्रस्तावाला मंजुरी
पुणे- पुण्यातील ऐतिहासिक पर्वती टेकडीवर आता थेट रोप-वे द्वारे जाता येणार आहे. पुणे महानगरपालिकेच्या स्थायी समितीने या महत्त्वाकांक्षी सारसबाग (पेशवे पार्क) ते पर्वती रोप-वे प्रकल्पासाठी सल्लागार नेमण्याच्या प्रस्तावाला मंजुरी दिली आहे. त्यामुळे सुमारे तीन दशकांपूर्वी राजकीय विरोधामुळे रखडलेला सारसबाग-पर्वती रोप-वेचा प्रकल्प आता नव्या स्वरूपात पुन्हा मार्गी लागण्याची चिन्हे आहेत.
प्रस्तावित योजनेनुसार, पेशवे पार्क ते पर्वतीपर्यंत सुमारे ७५० मीटर लांबीचा रोपवे बांधण्यात येईल. या मार्गावर १२ ते ४० मीटर उंचीचे पाच टॉवर्स उभारण्याची योजना आहे. प्रवाशांच्या येण्या-जाण्यासाठी प्रत्येकी आठ प्रवाशांची क्षमता असलेल्या बावीस केबिन्स प्रस्तावित आहेत. योजनेनुसार, रोपवे पेशवे पार्क ते पार्वतीपर्यंतचा प्रवास केवळ अडीच मिनिटांत पूर्ण करेल.
एका दिशेने ताशी १,५०० प्रवाशांची वाहतूक करण्याचा प्रस्ताव आहे. हे आकडे सध्या प्रस्तावित प्रकल्प योजनेचा भाग आहेत; सल्लागाराने तयार केलेल्या डीपीआर (DPR) आणि तांत्रिक-आर्थिक अभ्यासानंतर यात बदल शक्य आहेत. या संदर्भात, रोपवेचा प्रत्यक्ष खर्च, बांधकामाची कालमर्यादा, संचालन मॉडेल आणि प्रवासी भाडे यांसारख्या महत्त्वाच्या बाबींवर नंतर निर्णय घेतला जाईल.
सल्लागाराच्या जबाबदारीमध्ये प्रकल्पाची तांत्रिक आणि आर्थिक व्यवहार्यता तपासणे, सविस्तर प्रकल्प अहवाल (डीपीआर) तयार करणे आणि निविदा प्रक्रिया पूर्ण करणे ही सल्लागाराची जबाबदारी असणार आहे. तथापि, रोपवेचे बांधकाम आणि संचालन अद्याप निश्चित झालेले नाही. सल्लागाराच्या अहवालाच्या आधारे प्रकल्पाच्या अंमलबजावणीचा निर्णय घेतला जाईल. स्थायी समितीचे अध्यक्ष श्रीनाथ भीमाले यांच्या मते, रोपवे प्रकल्प विद्युत आणि यांत्रिक तंत्रज्ञानावर आधारित आहे. पुणे महानगरपालिकेकडे नियोजन, तांत्रिक चाचणी आणि निविदा प्रक्रियेसाठी आवश्यक असलेले विशेष मनुष्यबळ नाही. त्यामुळे, बाह्य तज्ञ संस्थेची नियुक्ती करण्याचा निर्णय घेण्यात आल्याचे भीमाले म्हणाले.
पर्वती टेकडी शहराच्या सरासरी पातळीपेक्षा सुमारे ३०० फूट उंच आहे. माथ्यावर जाण्यासाठी शंभरहून अधिक पायऱ्या आहेत. श्री देवदेवेश्वर संस्थानच्या परिसरात देवदेवेश्वरासह कार्तिकेय स्वामी, विष्णू, विठ्ठल-रुक्मिणी, गणपती आणि सूर्यदेव यांची मंदिरे आहेत. मात्र, ज्येष्ठ नागरिक, लहान मुले तसेच शारीरिक अडचणी असलेल्या नागरिकांना पायऱ्या चढणे शक्य होत नाही. त्यामुळे पर्वतीचे दर्शन लांबूनच घेण्याची वेळ अनेकांवर येते. रोप-वे झाल्यास सर्व वयोगटांतील नागरिकांना पर्वतीवर पोहोचता येणार असून, मंदिरदर्शनासोबत टेकडीवरील निसर्ग आणि पुण्याचे विहंगम दृश्य अनुभवता येईल.
