अजितदादांच्या विमान अपघाताच्या तपासाला गती देण्याची मागणी ; जय पवार यांनी CID अधिकाऱ्यांची घेतली भेट

पुणे – राष्ट्रवादी काँग्रेस पक्षाचे युवा नेते जय पवार यांनी आज पुण्यातील सी आय डी कार्यालयात संबंधित अधिकाऱ्यांची भेट घेऊन दिवंगत उपमुख्यमंत्री अजितदादा पवार यांच्या विमान अपघाताच्या तपासाचा सविस्तर आढावा घेतला.

यावेळी त्यांनी तपासाची सद्यस्थिती, आतापर्यंत झालेली कार्यवाही, तपास पूर्ण होण्यासाठी लागणारा संभाव्य कालावधी तसेच तपासातील प्रलंबित बाबींबाबत अधिकाऱ्यांकडे सविस्तर विचारणा केली. या प्रकरणाचा तपास अधिक गतिमान करून तो पारदर्शकपणे आणि विनाविलंब पूर्ण करण्याची आवश्यकता त्यांनी अधोरेखित केली.

“अजितदादांच्या विमान अपघातामागील सत्य समोर येणे हा केवळ एका कुटुंबाचा प्रश्न नसून, दादांवर अपार प्रेम करणाऱ्या लाखो नागरिकांच्या विश्वासाचा विषय आहे,” अशी भूमिका जय पवार यांनी यावेळी मांडली.

या अपघाताबाबत जनतेच्या मनात असलेल्या प्रश्नांची उत्तरे मिळणे, तपासातील प्रत्येक महत्त्वाच्या बाबीचा सखोल तपास होणे आणि सत्य जनतेसमोर येणे अत्यंत आवश्यक आहे. त्यामुळे तपासात कोणतीही दिरंगाई न होता सर्व संबंधित बाबींची गांभीर्याने चौकशी करून दोषींना जबाबदार धरण्याच्या दृष्टीने आवश्यक ती कार्यवाही व्हावी, अशी अपेक्षा त्यांनी व्यक्त केली. यावेळी त्यांच्यासोबत आमदार विक्रम काकडे उपस्थित होते.

अजितदादांच्या अपघाताचे सत्य समोर येईपर्यंत या प्रकरणाचा पाठपुरावा सुरूच राहील, असा ठाम निर्धारही जय पवार यांनी व्यक्त केला.