चिमुकल्या बाळाला सोडून २७ वर्षीय विवाहिता घरातून बेपत्ता ; मोशी परिसरातील घटना

चिमुकल्या बाळाला सोडून २७ वर्षीय विवाहिता घरातून बेपत्ता ; मोशी परिसरातील घटना 
Share

पिंपरी – मोशी परिसरामध्ये राहणारी एक २७ वर्षीय विवाहित महिला आपले ९ महिन्यांचे बाळ मागे घरातच सोडून बेपत्ता झाली आहे. या प्रकरणी संबंधित महिलेच्या पतीने एमआयडीसी भोसरी पोलीस ठाण्यात पत्नी बेपत्ता झाल्याची तक्रार दाखल केली आहे.

शिवानी असे या बेपत्ता झालेल्या महिलेचे नाव असून नागरिकांमध्ये चिंतेचे वातावरण निर्माण झाले आहे.

​मिळालेल्या प्राथमिक माहितीनुसार, शिवानी आणि तिच्या पतीमध्ये काही कारणांवरून किरकोळ स्वरूपाचा घरगुती वाद झाला होता. या वादानंतर रागाच्या भरात ती घराबाहेर पडली आणि त्यानंतर ती पुन्हा घरी परतलीच नाही. सायंकाळी जेव्हा तिचा पती आपले काम संपवून घरी परतला, तेव्हा त्याला आपली पत्नी घरात नसल्याचे आढळून आले. सुरुवातीला ती जवळपास कुठेतरी गेली असेल किंवा रागाच्या भरात थोडा वेळ बाहेर गेली असेल, असा अंदाज पतीने बांधला.

मात्र, घरात रडणारे तिचे ९ महिन्यांचे बाळ आणि पत्नीचा बराच वेळ होऊनही कोणताही थांगपत्ता लागला नसल्याने पतीने आजूबाजूला शेजाऱ्यांकडे, नातेवाईक मित्रमंडळी यांच्याकडे तिची चौकशी केली. परिसरात सगळीकडे शोध घेऊनही शिवानी कुठेच सापडली नाही. त्यानंतर पतीने अखेर थेट एमआयडीसी भोसरी पोलिसांत पत्नी हरवल्याची तक्रार दाखल केली. पोलीस या प्रकरणाचा कसून तपास करत आहेत.

Vedh News