पिंपरी – ‘अंमली पदार्थांचा विळखा म्हणजे वाघाची गुहा आहे. वाघाच्या गुहेत शिरलेला माणूस जिवंत परत येऊ शकत नाही. त्याप्रमाणेच चुकून किंवा कुतूहलाने अंमली पदार्थांचे सेवन केल्यास कालांतराने त्याचे पर्यवसान मृत्यूत होते’ असा गंभीर इशारा ज्येष्ठ सामाजिक कार्यकर्ते डॉ. मिलिंद भोई यांनी दिला.
पिंपरी – चिंचवड एज्युकेशन ट्रस्ट सभागृहात आयोजित लायन्स क्लब इंटरनॅशनल (डिस्ट्रिक्ट ३२३४ डी – २), रिजन ३, लायन्स क्वेस्ट, भोई प्रतिष्ठान आणि पीसीएटी यांच्या संयुक्त विद्यमाने आयोजित ‘अंमली पदार्थांना नकार… यशस्वी जीवनाकडे वाटचाल!’ या विशेष उपक्रमात डॉ भोई बोलत होते.
यावेळी लायन्स डिस्ट्रिक्ट गव्हर्नर श्रेयस दीक्षित, लायन्स क्वेस्ट डिस्ट्रिक्ट चेअरपर्सन प्रदीप कुलकर्णी, लायन्स रिजन चेअरपर्सन सलीम शिकलगार, लायन्स क्लब ऑफ पुणे फीनिक्सच्या अध्यक्षा अनुजा करवडे, रवी सातपुते, पीसीएटी डीन डाॅ. शीतल रवंदळे आदी मान्यवर उपस्थित होते.
डाॅ. भोई यांनी खुमासदार शेरोशायरी सादर केली. आपली सजगता एखाद्या अल्लड तरुण अथवा तरुणीचा मृत्यू रोखू शकते आणि त्याच्या कुटुंबाला मौलिक सुख प्रदान करू शकते म्हणून विद्यार्थी, पालक, अध्यापक यांनी या उपक्रमात सहभागी होऊन अंमली पदार्थांच्या महाबलाढ्य राक्षसाला गाडून टाका, असे आवाहन त्यांनी केले.
आपल्या प्रस्ताविकात प्रदीप कुलकर्णी यांनी जगातील सर्वाधिक तरुणाईचा देश अशी ख्याती असलेल्या भारतातील समृद्ध पंजाबची आता अंमली पदार्थांच्या व्यसनाधीनतेमुळे ‘उडता पंजाब’ अशी जगात नामुष्की होत आहे. त्यामुळेच महाराष्ट्रातील तरुणाईला यापासून वाचविण्यासाठी या विशेष उपक्रमाचे आयोजन केले आहे, अशी माहिती दिली.
यावेळी श्रेयस दीक्षित, सलीम शिकलगार, डाॅ. शीतल रवंदळे यांनीही आपले विचार मांडले.
याप्रसंगी भोई प्रतिष्ठान निर्मित एका विशेष ध्वनिचित्रफितीच्या माध्यमातून अंमली पदार्थांचे विविध प्रकार, औत्सुक्य किंवा वैफल्यातून त्याच्या विळख्यात सापडणारी तरुणाई, त्यातून होणारी आंतरराष्ट्रीय स्तरावरील अब्जावधी रुपयांची अवैध उलाढाल, व्यसनाधीन कोवळ्या तरुणांचा हृदयद्रावक अंत आणि संपूर्ण कुटुंबाची ससेहोलपट, व्यसनी व्यक्तीची लक्षणे, तिचे पुनर्वसन अशा बाबींवर सर्वंकष माहिती दिली.
लायन्स क्लब ऑफ पुणे फीनिक्सचे पदाधिकारी, भोई प्रतिष्ठानचे कार्यकर्ते आणि पीसीएटीचा कर्मचारीवर्ग यांनी संयोजनात परिश्रम घेतले. उज्ज्वला कुलकर्णी यांनी सूत्रसंचालन केले. अनुजा करवडे यांनी आभार मानले.
