केतन अग्रवाल हत्याप्रकरणी उज्ज्वल निकम यांची विशेष सरकारी वकील म्हणून नियुक्ती

पुणे- देशभरात गाजलेल्या केतन अग्रवाल खूनप्रकरणी ज्येष्ठ वकील उज्ज्वल निकम यांची विशेष सरकारी वकील म्हणून नियुक्ती झाली आहे. केतनचे वडील विशाल अग्रवाल यांनी निकम यांची नियुक्ती करण्याची मागणी केली होती.

मुख्यमंत्री देवेंद्र फडणवीस यांनी ही मागणी मान्य करून विधी व न्याय विभागाच्या सचिवांना आवश्यक निर्देश दिले होते. त्यानुसार ही नियुक्ती करण्यात आली आहे.

व्यावसायिक केतन अग्रवाल याचा १८ जून २०२६ रोजी लोहगड किल्ल्यावरील हत्ती तलावाजवळील दरीत ढकलून खून करण्यात आला. पुणे ग्रामीण पोलिसांनी या प्रकरणाचा तपास पूर्ण करून वडगाव मावळ न्यायालयात पाच हजार ५३ पानांचे दोषारोपपत्र दाखल केले आहे.

सिया प्रवीण गोयल, चेतन बाबुलाल चौधरी आणि रितेश संजय हंगे यांच्याविरोधात हे दोषारोपपत्र दाखल करण्यात आले आहे. यामध्ये आरोप निश्चित होऊन खटला लवकर सुरू होणे अपेक्षित आहे. निकम यांची नियुक्ती झाल्याने सरकारी पक्षाची बाजू मांडण्याच्या दृष्टीने या खटल्याला महत्त्व प्राप्त झाले आहे.

अशी घडली घटना

केतन अग्रवाल याचा विवाह त्याची फियान्से (भावी पत्नी) सिया गोयल हिच्याशी ठरला होता. सियाचे चेतन चौधरी नावाच्या तरुणाशी प्रेमसंबंध होते आणि तिला केतनसोबत लग्न करायचे नव्हते.

सिया गोयल आणि चेतन चौधरी यांनी ३१ मे रोजी एका कॅफेमध्ये केतनच्या हत्येचा कट रचला होता. १४ जून रोजी त्यांनी लोहगडावर हत्येचा पहिला प्रयत्न केला होता, तो यशस्वी झाला नाही.

ठरल्यानुसार, सिया केतनला फिरण्याच्या बहाण्याने लोहगड किल्ल्यावर घेऊन गेली. तिथे अगोदरच चेतन चौधरी पोहोचला होता. किल्ल्यावरील एका कड्यावर (दरीत) पोहोचल्यानंतर, सिया आणि चेतन यांनी मिळून केतनला ४०० फूट खोल दरीत ढकलून त्याची हत्या केली.